A Conferencia Norleste da Liga Nacional de Billarda chegou á súa fin. E ao igual que tódolos anos fíxoo co “Aberto do Coello de Suso” en Remourelle. Despois de dous anos sen o festivo peche final de temporada por mor da Covid, este ano tódalas palanadoras da serpe multicolor puideron gozar na pista e logo no baile-torrezmada final.
Sesenta e sete palanadoras se xuntaron nunha derradeira xornada na que, ademais do típico ambiente festivo, o cadro clasificatorio deseñado por Muriego foi visitado acotío para ver quen se alzaría co campionato. Unha fermosa parella de coellos criados con esmero por Villarino agardaban expectantes nunha tarde que ameazaba choiva, pero que rematou cun sol que convidaba a unhas cervexas servidas na TabernaLNB por Sandra e Lucía. Como é habitual nas últimas temporadas, os dez primeiros clasificados na xeral competiron no mesmo grupo e os máis ‘terrenais’ dividíronse noutros seis grupos.
A xornada serviu ademais para presenciar a volta ás pistas da LNB de varios palanadores históricos que tiñan o palán colgado. Marcos decidiu voltar no aberto da casa e formou parte duns Remourelle Bulls que rememoraron vellos tempos e acadaron a segunda praza por equipos. Tamén Andrés e Ginés, que formaran parte da franquicia local no seu día, voltaron á competición. Non sabemos se veñen pra quedar!
A competición voltou a demostrar unha vez máis a saúde da serpe multicolor, e amosou o bo facer dos máis novos. Os Diego, Mateu, Maré e moitos outros darán moito que falar máis cedo que tarde. Como era previsible nunha pista tan rápida como é a de Remourelle víronse un bo número de entradas directas e golpes espectaculares, onde Mark dos Madia Leva acadou puntos ao máis puro estilo dos Harlem Globetroters.
Nos seis grupos nos que o campionato ligueiro non estaba en xogo, tres palanadores sumaron 22 puntos. Jorge, dos Remourelle Bulls, Antom dos Madia Leva e Alvariño foron os mellores e tocoulles agardar se algún dos ‘favoritos’ os superaba.
O grupo dos favoritos non defraudou. Charli partía con sete puntos de vantaxe sobre Daniel e oito sobre Sachas. O de Muimenta non quixo dar ningunha oportunidade ao resto e comezou cun golpe directo para despexar dúbidas e incluso incrementou a diferencia na primeira praza. Os integrantes do podio non deron oportunidades aos perseguidores. Daniel amosou unha gran regularidade e Sachas, a pesar do seu comezo dubitativo refíxose e mantivo a terceira praza. Ao remate das cinco carreiras, Charli xa co campionato no peto, Regueiro e Isma sumaron 22 puntos e xogaron tres carreiras de desempate para dirimir o gañador do aberto.
Charli amosouse intratable e gañou as tres carreiras e fíxose co coello de Suso. Segundo foi o seu compañeiro Isma, amosando o gran nivel de Carabullo, e terceiro foi Regueiro, o capitán dos Troitas Bravas, ao que as presas por marchar muxir non lle xogaron unha mala pasada.
Na final de varados enfrontáronse os dous únicos palanadores que conseguiron semellante fazaña nesta campaña, Sachas de Troitas Bravas e Chousa de Carabullo. Tal como se agardaba, esta “pelexa de galos” non defraudou e despois de varios intentos, Chousa, cun golpe realmente incrible conseguiu levar o campionato para o seu equipo.
Remata a tempada e hai que dar os parabéns pola marabillosa organización a todos os equipos responsables de cada un dos abertos que configuran a Liga Nacional de Billarda, aos palanadores e palanadoras que fan centos de quilómetros ao ano para gozar desta paixón da billarda e que sen eles a LNB non existiría e, por suposto, aos campións e campioas. Para o ano máis e mellor, a LNB é imparable ¡Billarda sempre!
Marcos.
O Varal 